50 km gangan

 

Smellið hér fyrir gagnvirk kort á fullum skjá
50 km -  
25 km -
12,5 km -
5 km -

 

Í hnotskurn
Fyrstu 15 km eru strembnir, en þá liggur leiðin frá Seljalandsdal upp á Hnífa, Botnheiði og áfram yfir Fellsháls. Þaðan er léttur 10 km leggur niður að Nónvatni og áfram fyrir Engidal að Steini þar sem gangan er hálfnuð. Við Steininn er snúið við og haldið til baka að Nónvatni. Þaðan er farið yfir Fellshálsinn í annað sinn. Sá leggur er um 8 km langur og mjög strembinn. Loks liggur leiðin um Botnsheiði og fyrir Búrfell, þar sem við tekur erfitt klifur upp á Miðfellsháls. Þaðan eru 7 auðveldir km heim í mark.

 

Start: 290 m.y.s.
Hæsti hluti brautar: 614 m.y.s. (Fellsháls)
Hæðarmunur: 324 m
Lengsta samfellda klifur: 115 m hækkun (upp á Miðfellsháls, eftir um 42 km)
Heildarklifur: 1250 m

 

Drykkjarstöðvar:
Start -  Búrfell   5,2 km
Búrfell - Heiðin   4,5 km
Heiðin - Nónvatn 9,7 km
Nónvatn - Nónvatn 8,3 km
Nónvatn - Heiðin 6,7 km
Heiðin - Búrfell    5,4 km
Búrfell - Mark  10,2 km


Brautin
Lagt er af stað frá skíðagönguhúsinu á Seljalandsdal til norðurs eins og í hinum vegalengdunum. Fyrsti kílómetrinn er léttur hringur um start/marksvæðið en næsti kílómetri er hins vegar strembinn, með nokkuð bröttu klifri upp á Háubrún, einn af betri útsýnisstöðum brautarinnar. Þaðan er fallegt að horfa yfir Skutulsfjörðinn og upplagt að smella af einni mynd eða svo ef fólk er ekki að flýta sér þeim mun meira. Eftir það er haldið fram Brúnir, eins og kallað er. Þar er slétta sem þó er örlítið á fótinn og liggur leiðin undir skíðalyftuna í Sandfelli og svo áfram í góðan kílómetra eða svo áður en komið er að brautamótum. Hér skilja leiðir, 12,5 km brautin beygir til hægri en 25 og 50 km brautirnar halda beint áfram. Nú tekur við skemmtileg brekka upp sneiðing í átt að annarri skíðalyftu, Miðfellslyftunni. Þegar þangað er komið er heilmikil hækkun að baki, eða 155 metrar á fyrstu 4 km. Við höldum áfram u.þ.b. einn kílómetra í viðbót og komum þá að fyrstu drykkjarstöðinni, undir fallegu fjalli sem nefnist Búrfell. Nú tekur við vel þeginn léttur kafli áður en við þokum okkur yfir svokallaða Hnífa. Eftir þá, að loknum 8 km, tekur svo við nokkuð strembið klifur í 2 km upp að gatnamótum Breiðadals- og Botnsheiða, þar sem við komum að næstu drykkjarstöð. Þangað liggur akfær vegur, en hann er þó ekki opinn fyrir almenning, heldur eingöngu fyrir starfsfólk mótsins og neyðaraðstoð.

 

Áfram heldur brautin að mestu upp á við í 4,5 km í viðbót þar til komið er upp á Fellsháls. Hér hafa 15 strembnir km verið lagðir að baki og verðlaunin eru ríkuleg: Fallegt útsýni yfir Skutulsfjörðinn og svo léttur 5 km kafli niður að næstu drykkjarstöð við Nónvatn. Leiðin er svo áfram fremur létt fyrir Engidalinn og yfir að Steini, þar sem Fossavatnsgangan var ræst hér á árum áður. Við Steininn er gangan u.þ.b. hálfnuð og tímabært að snúa við. Nú gerist brautin erfið á ný, því við tekur nokkur hækkun upp að Nónvatni. Þar komum við aftur að drykkjarstöð og það er rétt að nota hana vel því framundan er mjög strembið 8 km klifur upp Fellshálsinn, sem er hæsti punktur brautarinnar. Þegar upp er komið hafa um 33 km verið lagðir að baki og við tekur léttur kafli niður að drykkjarstöðinni á Botnsheiði.

 

Nú eru framundan rúmir 5 km í tiltölulega þægilegu landslagi. Sú sæla varir þó ekki ýkja lengi því þegar við höfum heimsótt drykkjarstöðina undir Búrfelli í annað sinn, eftir u.þ.b. 16 km, hefst nokkuð strembið klifur þar sem kallað er „á milli fella“, þ.e.a.s. á milli fjallanna Búrfells og Miðfells. Þegar komið er upp í Gyltuskarð, þaðan sem hægt er að sjá niður í Botnsdal í Súgandafirði, er snúið til hægri og við tekur frægasta brekkan í Fossavatnsgöngunni, sjálfur Miðfellshálsinn. Hálsinn sá hefur reynst mörgum erfiður í gegnum áratugina. Hér er gengið upp langan, brattan sneiðing og fæstir eiga miklar orkubirgðir á tankinum þegar upp er komið. En það kemur svo sem ekki að sök því nú taka við léttir 7 km í mark, með löngu rennsli og ýtingum. Þó er rétt að vera á varðbergi því víða er rennslið mjög hratt og getur verið varasamt, sérstaklega fyrir óvana.